logo-osakidetza logo-gb

Noticias y Agenda

24/09/2019

XX Arreta Integratuaren Nazioarteko Konferentzia ICIC2020 Šibenik-en, Kroazian

Aurtengo apirilan Donostian eginiko XIX edizioaren ostean, IFIC-International Foundation of Integrated Care XX Arreta Integratuaren Nazioarteko Konferentzia antolatzen ari da Šibenik-en, Kroazian. Biltzar honek arreta integratuaren diseinu eta martxan jartzearekin lotura duten mundu osoko ikerlari, kliniko eta kudeatzaileak bilduko ditu. Antolakuntzan Kroaziako Osasun Ministerioak eta Zagreb-eko hiriak hartzen dute parte, osasun antolakunde eta unibertsitate kroaziarrez gain.

Batzorde zientifikoak biltzarraren gaiei lotutako komunikazioak bidaltzeko epea irekita dauka, urriak 11-rarte. Komunikazioak abstract formatua hartu behar du, 500 hitz gainditu barik. Konferentziako web orrialdean abstract-ak bidaltzeko gida jeitsi daiteke.

Abstract guztiak International Journal of Integrated Care (2.489ko inpaktu-faktorea) aldizkarian argitaratuak izango dira. Onartutako abstract-ak programaren barruan sartuko dira, ahozko komunikazio, tailer, ahozko poster-a edo poster arrunt moduan, Batzorde Zientifikoaren balorazioaren arabera, eta IFIC Arreta Integratuaren sariak lortzeko lehiatuko dira. Donostiako aurtengo edizioak 700 abstract baino gehiago jaso zituen.

11/09/2019

OSASUN ESTALDURA UNIBERTSALAREN ARLOAN OMERI AHOLKU EMANGO DION TALDEKO PARTAIDEA DA EUSKADI

Estatu ez den batzordekide bakarra da, Erresuma Batua, Norvegia eta Holanda bezalako herrialderekin batera

Osasunaren Mundu Erakundearen (OMS) helburu nagusietako bat da bilioi bat pertsonak kalitatezko osasun-arreta jasoko dutela bermatzea. Etorkizun hurbilean, 2023 baino lehen, erronka gisa ezarri da 1.000 milioi biztanleri ematea estaldura unibertsala.

Helburu horrekin, eta behar adina baliabide ez dituzten herrialdeei euren zerbitzu-kartera eratzen laguntzeko, OMSk Aholku Batzorde Tekniko bat osatu du, eta bere eginkizuna izango da herrialdeen ezaugarriak kontuan izango dituzten eta horietara egokituko diren osasun-prestazioen paketeak garatzea.

Eusko Jaurlaritzako Osasun Saileko kide bat, BIOEFen egungo zuzendaria dena, da nazioarteko 15 adituk osatutako aholkulari-talde horretako kideetako bat. Kidea Iñaki Gutiérrez da, eta Osasun Teknologien Nazioarteko Elkartearen (HTAI) presidentea ere bada (Eusko Jaurlaritzako Osasun Saila bertako kide instituzionala da).

Gutiérrezek, besteak beste, Norvegiako, Holandako eta Erresuma Batuko adituekin egingo du lan, eta hainbat herrialderi osasun-prestazioak diseinatzen eta garatzen lagunduko die. Berez, Euskadi da aholkulari-talde horretako estatu ez den entitate bakarra.

Alde horretatik, Nekane Murga sailburuak adierazi duenez, “Eusko Jaurlaritzako Osasun Sailarentzat harro egotekoa da OMSren nazioarteko aholkulari-taldean parte hartzea eta Euskadi-Basque Countryk osasunaren arloan duen jakintzarekin lagundu ahal izatea”.  

Sailburuak azpimarratu duenez,  “Euskadik orain dela urte asko ezarri zuen bertan bizi diren pertsona guztientzako osasun-estaldura unibertsala, eta erreferentzia da teknologien ebaluazioan, arreta-zerbitzuen karteretarako prestazioak hautatzeko metodo gisa”.

Azkenik, Nekane Murgak adierazi du “gure osasun-sistema publiko eta unibertsala nazioartean azaltzea lagungarri izango da gure herrialde-marka, ‘Euskadi Basque Country’, zabaltzeko, bai eta nazioarteko proiekzioa duten herrialdeetako esperientzietatik ikasteko ere”.

Azkenik, OMSk hainbat erreminta emango dizkie herrialdeei bertako sistemak garatzen eta eguneratzen jarraitzeko, DECIDE izeneko plataforma berri baten baitan, eta hor ere parte hartuko du BIOEFen zuzendariak.

IREKIA. Eusko Jaurlaritza – Gobierno Vasco

EITB 

EL DIARIO VASCO 

COPE 

DocNews 

10/09/2019

Biriketako minbiziaren gaineko ikerketa-proiektuetarako laguntzen deialdia onartu da, BIOEFek kudeatutakoa

Osasun Sailak hala proposatuta, Gobernu Kontseiluak biriketako minbiziaren gaineko ikerketa-proiektuetarako laguntzen deialdia onartu du, BIOEFek kudeatutakoa. Deialdiaren zenbatekoa 302.000 eurokoa da, eta EITBk, herritarren eta erakundeekin batera, gaixotasun baten edo gehiagoren inguruan ikertzeko urtero antolatzen duen maratoi solidarioari esker lortzen da.

 

Zientzia, Teknologia eta Berrikuntzaren Euskal Sareko eragileei zuzenduta dago deialdia, eta, aurreikusitakoaren arabera, irailean argitaratuko da EHAAn.

Irekia

“BIOEFen eta EITB Maratoiaren arteko lankidetza”

 

02/08/2019

SAVE THE DATE! INFORMAZIO JARDUNALDIA: AZKEN H2020 DEIALDIAK RIS3 EUSKADIRI BURUZKO GAIETAN

2019ko urriaren 3an eta 4an, Innobasque, SPRI eta BEAZ Basque Enterprise Europe Network (EEN) partzuergoko kideak─, BIOEF, EEE/EVE eta CDTIk elkarlanean jardunaldi bat antolatuko dute Horizon 2020 Europako Esparru Programaren azken deialdiei buruz.

Infoday honen helburua, egun osoko eta egun erdiko jardunaldietan banatuta, Horizon 2020 Lan Programa berriak ezagutaraztea da; programa hauek 2018-2020 denboraldiko azken urterako, programaren azkenekorako, Europako Batzordeak argitaraturikoak dira.

H2020 programa itxiko duten jarduera-ildoak aurkeztuko dira RIS3 Euskadiri buruzko gaietan: NMBP, Energia, IKTak, Garraio, Osasun eta Elikadura Segurtasuna.

Infoday Horizon 2020 gaiak eta datak honako hauek izango dira:

  • Osteguna, urriak 3, goizez: NMBP eta ENERGIA
  • Osteguna, urriak 3, arratsaldez: IKTak (Informazioaren eta Komunikazioaren Teknologiak) eta GARRAIOA
  • Ostirala, urriak 4, goizez: OSASUNA eta ELIKADURA-SEGURTASUNA

Jardunaldi horietan, Harremanetako Puntu Nazionalekin (NCP) hainbat gairen inguruan bilerak hitzartzeko aukera emango da.

Datorren irailaren 4an gonbidapena bidaliko dugu nahi dituzun gaietan izena eman dezazun, baita NCPrekin bilerak eskatu ahal izateko argibideak ere.

30/07/2019

Euskal Osasun Sistema Publikoak TBMED proiektuaren garapenerako lankidetzaren bileran hartu du parte

TBMED proiektuak aurrera darrai berrikuntza irekiko saiakuntza-banku bihurtzeko

2019ko uztailaren 9an eta 10ean, TBMED proiektua martxan jarri zenetik urte-erdi igaro zela, haren partzuergoa Parisen (Frantzia) bildu zen lehenengo bilera egiteko. Didier Letourneurrek eta TBMED proiektuko bazkide den INSERMeko haren taldeak antolatu zuten bilera.

Bileraren helburu nagusia bazkideek egindako lana eguneratzea eta urteko gainerako jarduerak planifikatzea izan zen. Eztabaidetan garbi geratu zen bazkideak ohitu direla beren zereginetara eta elkarlan estuan ari direla proiektuaren amaieran berrikuntza irekiko saiakuntza-banku bat ezartzeko erronkari aurre egiteko (ingelesez, Open Innovation Test Bed —OITB—). Ondorioz, bileraren bigarren egunean saio berezi bat egin zen OITBren sorrerari buruz; bertan erronkak zehaztu ziren, eta haiek gainditzeko ideiak garatu.

Bileraren aurretik, saio ireki bat egin zen, eta hartara Gecko Biomedical / TISSIUM, 4D Cell eta BforCures enpresetako ordezkariak eta Medicen taldea gonbidatu ziren. Beren negozioak ezartzean bizi izandako esperientzia partekatu zuten, eta garapen-arloan dituzten arazoak azaldu, bereziki Europako ETEei prozesuak errazteko etorkizuneko OITBk eskaintzen dizkien aukerei dagokienez.

TBMED proiektuan Frantziako, Irlandako, Espainiako eta Alemaniako 13 bazkide europar daude. Proiektua CIDETECek koordinatzen du, eta hauek dira bazkideetako batzuk, Euskal Osasun Sistema Publikoaren ordezkari gisa: Osakidetza; Bioaraba, Biocruces Bizkaia eta Biodonostia Osasun Ikerketa Institutuak; Osteba; eta BIOEF Berrikuntza + Ikerketa + Osasuna Eusko Fundazioa. Proiektuan, Euskal Osasun Sistema Publikoak aholkularitza klinikoa, osasun-arloko teknologiaren ebaluazioa eta kontzeptu-saiakuntza klinikoak egiten ditu.

Proiektuari buruzko informazio gehiago: https://tbmed.eu/

 

 

 

Proiektuak Europar Batasunaren Horizon 2020 ikerketa- eta berrikuntza-programaren funtsak jaso ditu 814439 zenbakiko dohaintza-akordioari jarraikiz.

 

18/06/2019

APIC2 nazioarteko konferentzia. Komunikazioak bidaltzeko deialdia zabalik

Zaintza Integratuarentzako Nazioarteko Fundazioa (IFIC), Newcastleko Unibertsitatearekin, Centre for Rural & Remote Mental Health, Children’s Health Queensland, Central Coast Local Health District, The Australian Healthcare & Hospitals Association eta Health Justice Australiak, 2019ko azaroaren 11tik 13ra, Melbourne-n (Australian) egingo den Zainketa Integratuari buruzko Asia Pazifikoko II. Konferentzia, antolatu du. Konferentziak osasun eta gizarte zerbitzu integratuen diseinuan eta banaketan parte hartzen duten ikertzaileak, medikuak eta mundu osoko kudeatzaileak bilduko ditu eta, lehen aldiz, ahozko osasunaren arazoa aztertuko dute osasuna eta ongizatea hobetzeko. pertsonen zainketa integratuaren bidez.

Batzorde zientifikoa, arreta integratuaren politika eta praktikaren eremuan aritzen diren nazioarteko adituek osatzen dute. Zientzia, ezagutza eta arreta integratuaren ezarpenari buruz, eta batez ere, kongresuaren gai zehatzei buruzko komunikazioak bidaltzeko deialdia ekainaren 28ra arte egongo da irekita. Komunikazioen laburpena edo “abstract”-a 500 hitzekoa izan behar da gehienez. Komunikazioak bidaltzeko gida konferentziaren webgunetik deskargatu daiteke.

Onartutako laburpen guztiak International Journal of Integrated Care-n (Impaktodun Faktore 1.837) argitaratuko dira. Onartutako laburpenak programan agertuko dira ahozko komunikazio formal, tailerra, ahozko poster edo erakusketa poster gisa, hau da, komite zientifikoak egokien aukeratutako formatuan. Onartutako laburpen guztiek urteko IFIC Integrated Care sarietarako lehiatuko dira. Aurtengo apirilean Donostian izan den nazioarteko konferentzian 700 komunikazio baino gehiago jaso ziren.

29/05/2019

ICIC19 San Sebastian – Basque Country Konferentziari buruz azpimagarriena (laburpenak, elkarrizketak, ponentziak, argazkiak eta bideoak)

Joan den apirilean Donostiak 60 herrialde baino gehiagoko eta hainbat lanbide desberdinetako 1.300 ordezkari baino gehiago bildu zituen, Arreta Integratuari buruzko XIX. Nazioarteko Konferentzian (ICIC19). Jardunaldia OSAKIDETZA, BIOEF, Eusko Jaurlaritzako Osasun Sailak, Donostiako Udalak, Gipuzkoako Foru Aldundiak eta IFIC-ek (Arreta Integratuari buruzko Nazioarteko Fundazioak) bultzatu zuten.

 

Aurten, jasotako abstrakt edo komunikazio laburpenen marka autsi eta gero, hitzaldiak 350 aurkezpen baino gehiago bildu ditu osoko bilkuretan eta saio paraleloetan, 125 tailer eta interes bereziak zituzten talde bilerak, 450 poster erakusketa eta berrikuntza eremuan 12 esperientzi-tailer aurkeztu ziren, eta halaber, tokian tokiko gizarte eta osasun zerbitzuetako ereduak bisitatzeko aukera.

Jadanik eskuragarri daude hizlari, delegatu eta bazkide nabarmenei egindako elkarrizketak, halaber, aurkezpenak, argazkiak eta bideoak ere (ikus beheko estekak).

Hitzaldien artean, aipatzekoa da Michael Marmot-en aurkezpena, osasunaren gizarte eragileei buruzkoa. Michael-ek  bizi itxaropen krisiari buruz ohartarazi zigun eta zelan, igoera lazgarri baten ostean, gaur egun, mendebaldeko herrialde askotan beherakada edo geldialdi bat ematen ari den. Krisi hau ekiditeko, osasunaren gizarte-eragileei begiratu behar diegu eta ulertu zergatik jendeak drogetara edo beste ohitura txarreko erabiletara jotzen duen, bere buruaz beste egiten ari den eta, oro har, okerrago bizi den. Adibidetzat jarri zituen Costa Rica eta Cuba, bizitza iraupen luzeago batekin, baina askoz ere baliabide gutxiagorekin. Gaur egun, pobreenen baldintza sozialak hobeak dira Costa Rica eta Cuban Estatu Batuetan baino. Michaelen aurkezpen osoa hemen ikus dezakezu.

Ondoren, saio horretan bertan, María Ángeles Duran-ek galdetu zigun zer ulertzen dugun “zaintza” hitzaz, eta ordaindutako arreta edo zaintza bakarrik ote den. Kontzeptua ez dugu argi definitu. Nola aintzatetsi ditzazkegu zaintzaileak (emakumeak) sozialki? Zahartzen direnean, nork zainduko ditu eta zergatik ez diegu ordaintzen? Maria Angelesek ohartarazi zigun gizonek aberats hiltzen direla beraien denbora diruaren truke saltzen dutelako, baina emakumeena doakoa dela. Mª Ángelesen aurkezpen probokatzailea hemen ikus dezakezu (gaztelaniaz).

Azken osoko bilkuran, Henry Mintzberg-ek esan zigun ebidentziatik esperientzieara pasa behar garela. Neurketak arreta suntsitu dezakeela eta ezin garela dena neurtzen ibili. Ikaskuntza ez da neurtzen. Esan zuen kontuz ibiltzeko neurketak ez gaitzan gu kontrolatu. Aipatu zuen kategorizazio, merkaturatze eta kalkulu gehiegi zegoela eta honek zerbitzuen kalitateegan duen eraginari buruz gogoeta egin zuen. Hiru premisa hauek aztertu behako lirateke, arreta sanitarioaren praktikan nola oztopatzen eta laguntzen duten kontutan izanda. Kudeaketa eta lidergotza elkarlotuta daudela gogorarazi zigun, lider batek kudeatu egin behar duela eta administratzaile batek gidatu. Mintzbergek azpimarratu zuen “Osasuna ez dela negozioa!”. Mintzbergen osasun zerbitzuetako lidergotza eta kudeaketari buruzko ideiei buruz gehiago jakiteko, hemen elkarrizketa osoa ikus dezakezu.

AURKEZPENAK: https://drive.google.com/drive/folders/1VYV4RlIwRzfEIzDovHpRdOMjUsG2Rf-y

ARGAZKIAK: https://www.dropbox.com/sh/kmjzvmnwbhg1sx6/AABPTuRqGS_AQmzFEHoUtqfda?dl=0

BIDEOAK: https://www.youtube.com/channel/UCxBgN0SeGQlAQWqn0yfvjIQ/playlists

ELKARRIZKETAK: https://vimeo.com/336322185?mc_cid=6b7c21794d&mc_eid=39547ff4b8

23/05/2019

BIND 4.0 programak Euskal Osasun Sistema Publikoa hurbiltzen die ETEei, I+G+b arloan elkarrekin lan egin dezaten

BIOEFek Biocruces Bizkaia OIIan startup-ei zuzendutako jardunaldi bat antolatu du, Euskal Osasun Sistema Publikoaren berrikuntza irekiko eredua eta enpresei eta beste eragile zientifiko-teknologikoei I+G+b arloan lankidetzarako eskaintzen dituen aukerak ezagutzera emateko.

Jardunaldi hau BIND 4.0 programaren barruan sartzen da, Eusko Jaurlaritzak foru aldundiekin, EAEko hiru lurraldeetako BICekin eta lurraldean errotutako enpresa handiekin elkarlanean bultzatua. Startupen azeleraziorako nazioarteko programa publiko-pribatua da, tokiko enpresa “traktoreekin” elkarlanari zuzendua, besteak beste hurrengo 4.0 industria teknologien inguruan: Big Data, errealitate birtuala/areagotua, robotika kolaboratiboa, zibersegurtasuna, Internet of Things, 3D inprimaketa, etab.

BIND 4.0 programa RIS3 Euskadi Espezializazio Adimentsuaren Estrategian adierazitako lehentasuneko hiru eremuekin dago lerrokatuta: Fabrikazio aurreratua, Energia eta etengabe hedatzen doan Biozientziak-Osasuna sektorea. Osasun sistema funtsezko bazkidea da sektore honetan, eta hala islatzen da Osasun Sailaren Osasun arloko Ikerketa eta Berrikuntzarako Estrategia 2020 delakoan, zeinaren helburu nagusia biztanleen osasuna eta Osasun Sistema hobetzen laguntzea eta, gainera, Euskadin balioa eta garapen ekonomikoa sortzen laguntzea den. Apustu hori agerian geratu da Innosasun programan, esaterako, zeinaren helburua osasun sistema erreferentziarako bazkide estrategiko bihurtzea den, gaitasunak eta jakintza garapen ekonomikoaren esku jartzeko eta enpresei euren produktuak eta zerbitzuak garatzen laguntzeko.

BIOEFek, RIS3 Biozientziak-Osasunaren idazkaritza teknikoa, eta hiru Osasun Ikerketa Institutuek, Bioaraba, Biocruces Bizkaia eta Biodonostia, hartu dute parte jardunaldian. Azken hirurok haien ardatz estrategiko eta ikerketa arlo nagusiak, eta zentroek I+G+b arloari laguntzeko dituzten plataformak aurkezteko aukera izan dute.

Bukatzeko, Biocruces Bizkaia OIIaren instalazioetara bisitaldia egiteko aukera egon da. Enpresek zuzenean ezagutu dituzte EOSPren goi mailako azpiegiturak eta gaitasunak. Animaliategia eta Animaliekin Esperimentatzeko Unitatea plataforma, Mikroskopia plataforma eta laborategi nagusiak bisitatu dira, besteak beste. Jardunaldiaren bukaeran I+G+b arloan enpresekin lankidetzarako osasun sistema irekia bistaratu da.

 

Irudia. Ezkerretik eskuinera, Marian Gabilondo (Bind 4.0 programaren koordinatzailea, BIC Gipuzkoa), Iñaki Zorrilla (Bioaraba OIIaren ZKUaren koordinatzailea), Eunate Arana (Biocruces Bizkaia OIIaren koordinatzaile zientifikoa) eta Lorea Mendoza (Innosasun programaren Koordinatzailea, BIOEF).

17/05/2019

BIOEF-ek Refbio-ren bigarren fasearen itxiera-jardunaldian hartu du parte

Iragan ekainaren 13an, Iruñean izan zen topaketan Euskal Osasun Sistema Publikoko 12 profesional elkartu ziren, eta 6 proiekturen emaitzak eman zituzten jakitera bertan

Euskal Osasun Sistema Publikoko (EOSP) kideek, Biocruces-Bizkaia eta Biodonostia Osasun Ikerketa Institutuek, Berrikuntza+Ikerketa+Osasuna Eusko Fundazioarekin batera (BIOEF), RefbioII-ren itxiera-jardunaldian hartu dute parte, Navarrabiomed zentroaren egoitzan ospatua. Pirinioetako Ikerkuntza Biomedikoko Mugaz Haraindiko Sarearen bigarren fase honek sareko 9 kide elkartu ditu (ikerketa-zentroak, ospitaleak, unibertsitateak eta enpresak), sektore biomedikoko hainbat profesionalez gain. Guztira, eskualde kideetako (Aragoi, Euskadi, Errioxa, Akitania Berria, Okzitania eta Nafarroa) ehun bat profesionalek hartu dute parte ekitaldian. Haiek, ezagutzera eman dituzte “Lankidetza proiektuen” eta “I+G-ko Berrikuntza eta Emaitzen Transferentzia Proiektuen (PITRID)” deialdietan garatutako 20 proiektuen emaitzak.

Jardunaldiaren irekieran aritu ziren: Izaskun Goñi, Nafarroako Gobernuaren Ekonomia- eta enpresa-politikako eta Laneko Zuzendari nagusia; Olga Irastorza, CCI Transfronteriza, Bihartean erakundearen presidentea eta Interreg POCTEFA Competitiv’eko proiektuaren ordezkaria; eta Marisol Fragoso, Navarrabiomed zentroaren kudeaketa-zuzendaria eta 2012an abian jarri zenetik Refbio ekimenaren burua.

Sortu zenetik, Refbio-ren xedea izan da ikerketa biomedikoan mugaz haraindiko lankidetza sendotzea. Gainera, bigarren fase honetan zehar, are garrantzia handiagoa eman zaio berrikuntzari eta emaitzen erabilerari eta transferentziari.

Zentzu horretan, 2016-2019 aldian, 49 ikerketa-talde gehiago sartzea lortu da, 20 proiektutan aritzeko: 7 Lankidetza proiektu eta 13 PITRID. Azken horietatik, 6 proiekturen buru izan ziren SSPV ELIFRAIL (Itziar Vergara, Biodonostia), IBD-IFXADA (Sergio Cardoso, Berrikuntza+Ikerketa+Osasuna Eusko Fundazioa – BIOEF), SAT-PREDIAB (Urko Aguirre, Biocruces-Bizkaia OII), AGEHDACIS (Jaione Auzmendi, Biodonostia OII), DATAANAERC (Marcos Arauzo, Biodonostia OII) eta IKERICTUS (Iraide Alloza eta Marimar Freijoo, Biocruces-Bizkaia OII).

 

Oro har, ekimen horiek – terapia zelularraren, onkologiaren, neurozientzien, genetikaren, epidemiologiaren, arlo kardiobaskularraren, gaixotasun infekziosoen, osasuneko teknologiaren, biobankuen eta saiakuntza klinikoen arloetakoak – kide diren erakundeetan 23 pertsona kontratatzen lagundu dute.

Horrez gain, RefbioII proiektuan eskualdeen arteko lankidetzako 2 tailer garatu dira, Bilbon eta Tolosan (Frantzia), non sektore biomedikoko 300 profesionaletik goraren parte-hartzea lortu zen. Parte hartzaileen artean 20 enpresatako ordezkariek hartu zuten parte, zeinak 100 kontaktutik gora ezarri zituzten mugaz haraindiko lankidetzarako.

Ikerketa onkologikoaren inguruko osoko biltzarra

Itxiera-jardunaldian Xose M. Fernández-ek hartu du parte, biologia molekularrean eta bioinformatikan aditua eta egun Institut Curie institutuan (Paris) Datuen Zuzendaria, zeina erreferentziako zentroa den minbiziaren ikerketan eta tratamenduan. Fernándezek gaur egun gaixoek sortzen dituzten datu klinikoen, molekularren eta genomikoen “tsunamia” nabarmendu du eta baita aukera terapeutiko onenak zehazteko informazio klinikoa erabiltzeko modua nola landu ere. Saioan zehar, lan egiten duen zentroak garatzen dituen metodo eta tresna berritzaileak zein diren eta haiek eremu onkologikoan dituzten erabilerak eman ditu ezagutzera.

Ikerketaren kudeaketarako ere egon zen denbora programan. Juan E. Riesek landu du gai hori, Instituto de Salud Carlos III erakundearen nazioko ordezkaria, zeinak jakitera eman dituen Osasun arloan I+b-ren finantzazio aukera berriak eta Europako hurrengo lehiaketen deialdien gako-arloak.

Refbio-ren inguruan informazio gehiago

Sarean 7 urtez gogoz lan egin ondoren, Refbio-k lortu du bere helburua, Pirinioen bi aldeetako profesionalek ikerketa biomedikoko lankidetza proiektuetan aritzea lortu baitu. Hemendik aurrera, sareak bi faseetan sortutako komunikabideei eta kontaktuei eutsiko die zentro-anitzeko ekimenak garatzeko.

Refbio-ren bigarren fasearen % 65 Eskualdeen Garapenerako Europako Funtsak finantzatu du (FEDER) Interreg V-A Espainia-Frantzia-Andorra Programaren esparruan (POCTEFA 2014-2020). POCTEFAren helburua Espainia-Frantzia-Andorraren arteko mugen bateratze ekonomiko eta soziala sendotzea da. Mugaz haraindiko jarduera ekonomikoak, sozialak eta ingurumenekoak garatzen laguntzen du lurraldearen garapen jasangarrirako baterako estrategien bitartez.

Refbio-ren bigarren faseko erakunde kideak:

 

16/05/2019

ITHACA proiektuak Europako 8 eskualdetako ordezkariak bildu zituen 2020-2021eko ekintza-plana zehazten lagunduko duen esparru estrategia aurkezteko

  • 2020-2021eko ekintza-plana garatzeko abiapuntua izan zen Berrikuntza+Ikerketa+Osasuna Eusko Fundazioak-BIOEFek eta Biodonostia Osasun Ikerketa Institutuak antolatutako workshop-a.
  • Zahartze aktibo eta osasuntsuaren ikerketan eta berrikuntzan oinarritzen da proiektuaren jarduera nagusia.
  • Euskal Osasun Sistema Publikoak ITHACA proiektuan hartzen du parte Bioef, Biodonostia eta Kronikgune bitartez; lehenak partner gisa eta beste biek stakeholder gisa jarduten dute.

InnovaTion in Health And Care for All” (ITHACA) proiektuaren helburu nagusia ekosistemari (herri-agintariak, industria, akademia eta gizartea) osasunaren eta arreta sanitarioaren inguruko jakintza sortzen eta irtenbide berritzaileak hedatzen laguntzeko eskualdeko politikak hobetzea da, Europako herritarren mesederako.

Aipatutakoa lortu ahal izateko, osasunaren eta arreta sanitarioaren arloko berrikuntza adimendunari buruzko esperientziak eta jardunbide egokiak partekatu dira proiektua egikaritzeko lehen fasean zehar, biztanleriaren zahartze aktibo eta osasuntsua sustatzeko helburuarekin. Ezagutza honetatik abiatuta, bigarren fasean, bazkideak bederatzi eskualde-ekosistemen hobekuntzan ardaztuko dira, eta ardatz nagusia zahartze aktiboa eta osasuntsua izango da.

Biodonostia Osasun Ikerketa Institutuan (Biodonostia OII) egindako topaketak Herbehereak, Frantzia, Danimarka, Ingalaterra, Polonia, Eslovenia, Italia, Alemania eta Euskal Herriko 40 pertsona biltzea lortu du eta, guztien artean, proiektuaren bigarren fasean zehar (2020-2021) ezarriko den ekintza-plana prestatzeko prozesuari ekin diote.

Bi bloketan egituratu zen jardunaldia. Lehen blokeak hurrengoa hartu zuen barne: Biodonostia Osasun Ikerketa Institutuko (Biodonostia OII) zahartzeari buruzko estrategiaren hedapen-saio bat, ITHACA proiektuaren esparru estrategiaren aurkezpena (bederatzi eskualdeek identifikatu eta partekatutako jardunbide egokietatik abiatuz sortutako estrategia) Astrid Kaagen eskutik (North Brabant eskualdekoa eta proiektuaren burua)-, eta eskualde bakoitzaren hobekuntza eremuei buruzko bederatzi eskualdeen aurkezpena.

Bigarren blokean, aldiz, eskualde eta eskualdearteko taldetan egin da lan. Saio horietan, eskualdeko ekintza-planaren parte izateko hautagai diren zahartze aktiboari buruzko irtenbide adimentsuak hausnartu, identifikatu eta garatu dira. Jarraian, bertaratutako guztiek Biodonostia OII-ko eta Gipuzkoako Zientzia eta Teknologia Parkeko azpiegiturak ezagutzeko aukera izan dute. Azken honen egoitzan, Gipuzkoako Biozientzia-Osasunaren arloan lan egiten duten enpresak aurkeztu ziren.

ITHACA proiektuari buruzko informazio gehiago: https://www.interregeurope.eu/ithaca/

Ander Matheuren eskutik, Biodonostia OII-ren Zahartze Estrategiaren aurkezpena

 

Biodonostia OIIn ITHACAren workshopera bertaratutakoak, 2019ko martxoak 16

 

ITHACAren workshopera bertaratutakoak, Gipuzkoako Zientzia eta Teknologia Parkearen egoitzara egindako bisitaren ondoren

 

2019ko martxoak 16

top
<Itxi